Qidiruv filtrlari, anonim administratorlar, kanal fikrlari va boshqalar

Bugungi yangilanishda yozishmalarda tezkor qidirish uchun qidiruv filtri, shuningdek, guruhni anonim boshqarish imkoniyati, kanallardagi postlarga fikr bildirish va boshqa koʻplab funksiyalar qoʻshildi.

Qidiruv filtrlari

Endi yangi varaqlar yordamida qidiruv natijalarini turi asosida qidirishingiz mumkin: Multimedia, Havolalar, Fayllar va boshqalar. Foydalanuvchi, guruh, kanal yoki bot nomi yozilganida manba asosida filtr qoʻshiladi.

Bu qidiruv filtrlarini birlashtirish mumkin – masalan, 2016-yil, martda yuborilgan, “qayiq” soʻzi mavjud boʻlgan xabarni qidirish.

Anonim guruh administratorlari

Telegram ilovasidan demokratiya va ozodlik uchun namoyishlarni tashkillashtirishda keng foydalanilmoqda. Bugun biz xavfsizroq namoyishlar uchun yana bir vositani taqdim etmoqdamiz.

Administrator huquqlarida Anonimlik bandini yoqing va ushbu administrator aʼzolar roʻyxatidan berkitiladi. Uning chatdagi xabarlari kanallardagiga oʻxshab guruh nomidan post qilinadi.

Kanal fikrlari

Aytgancha, kanallar haqida: biz muhokama guruhiga ega kanallardagi postlarga fikr bildirish tugmasini qoʻshdik. Har bir post uchun fikrlar oʻz boʻlimida chiqariladi, lekin administratorga tartibni kuzatish oson boʻlishi uchun barcha fikrlar kanalga biriktirilgan guruhga ham oʻtkaziladi.

Agar siz kanalning muhokama guruhi aʼzosi boʻlmasangiz, Javoblar deb nomlangan yangi chat orqali xabardor qilinasiz.

Faqat cheklangan vaqtda siz bu funksiyani ushbu kanalda sinashingiz mumkin.

Agar oʻz kanalingizda muhokamalarni yoqishni xohlasangiz, Kanal sozlamalari > Muhokama rukniga kiring.

Android uchun boshqa yangilanishlar

Android ilovasida yangi ravon animatsiyalar paydo boʻldi. Ular klaviaturani berkitganingizda yoki kengaytirganingizda, shuningdek, chapdagi menyu orqali kun va tun mavzularini almashtirganingizda chiqadi. Bundan tashqari, animatsiyali qalqib chiquvchi oynalar qoʻshildi – masalan, xabarlarni oʻchirishda, chatlar uchun bildirishnomalar sozlamalarini oʻzgartirishda yoki multimediani saqlashda.

Guruh chatlarida aʼzoning profil rasmini bosib turish orqali uning kattalashtirilgan rasmini koʻrish mumkin. Bir ilovada bir nechta hisobdan foydalanadiganlar endi hisob almashtirgichini bosib turish orqali boshqa hisoblaridagi chatlar roʻyxatiga nazar solishi mumkin.

Yangi animatsiyali emojilar

Biz animatsiyali emojilar qatorini boyitishda davom etmoqdamiz. Animatsiyali versiyasini koʻrish uchun istalgan chatga alohida xabarda quyidagi emojilardan birini yuboring.

Buguncha shular, fikrlaringizdan xursand boʻlamiz.

2020-yil, 30-sentabr
Telegram jamoasi