Jonli efirlar, moslashuvchan uzatish sozlamalari, kanallar orasida tezkor oʻtish va ommabop stikerlar

Yaqinda nishonlangan Telegramning sakkiz yilligi munosabati bilan Telegram 8.0 yangi versiyasida guruh va kanallarda cheklanmagan auditoriya bilan jonli efir qilish imkoniyati, xabarlarni uzatishda yuboruvchi ismi va rasmlar izohlarini olib tashlash imkoniyati, chatlar roʻyxatiga qaytmasdan keyingi oʻqilmagan kanalga oʻtish imkoniyati, yangilangan stikerlar paneli va boshqalarni taqdim etamiz.

Cheklanmagan jonli efirlar

Avvalgi yangilanishimiz guruhli video chaqiruvlarni video translatsiyalari uchun kuchli vositaga aylantirdi. Bugundan boshlab tomoshabinlar soniga cheklovlar yoʻq.

Kanalda jonli efir yoki guruhda videochat boshlang – endi har ikkalasida ham cheklanmagan tomoshabinlar ishtirok etishi mumkin. Oʻz telekanalingizni ishga tushirish imkoniyati shu yerda – choʻntagingizda.

Boshlash uchun siz admini boʻlgan hamjamiyat profil sahifasida “Videochat” (guruhlarda) yoki “Jonli efir” (kanallarda) bandini bosing.

Jonli efiringiz tomoshabinlari qoʻl koʻtarishi va ular gapirishiga ruxsat bersangiz efirga qoʻshilishi mumkin.

Moslashuvchan uzatish sozlamalari

Xabarlarni uzatish soddaroq va qulayroq boʻldi. Uzatmoqchi boʻlgan xabaringizga razm solish va sozlamalarni oʻzgartirish uchun kiritish maydoni yuqorisidagi “Xabarni uzatish” bandini bosing.

Multimedia xabarlarida yuboruvchi nomini yoki izohlarni berkitishingiz ham mumkin. Shuningdek, siz yuborishni xohlamagan tanlangan xabarlarni bekor qilishingiz yoki qabul qiluvchini oʻzgartirishingiz ham mumkin.

Keyingi kanalga oʻtish

Telegramda yangiliklar, koʻngilochar va taʼlim kabi turli mavzulardagi millionlab kanallar yaratilgan.

Postlarni kuzatish qulayroq boʻlishi uchun endi chatlaringiz roʻyxatiga qaytmasdan kanallardagi barcha yangi xabarlarni koʻrishingiz mumkin. Kanalning eng oxirgi postiga yetganingizda keyingi oʻqilmagan kanalga oʻtish uchun ekranni yuqoriga torting.

Agar chatlaringiz roʻyxatini jildlar yoki arxivlangan chatlar bilan tartiblagan boʻlsangiz, ilova siz sozlagan tuzilmaga rioya qiladi: joriy jilddagi kanallar, keyin barcha chatlar va arxivda qolgan chatlar. Koʻngilochar kanallarga chalgʻimasdan ish boʻyicha barcha kanallarni oʻqish uchun shunchaki kerakli jilddagi kanalni oching.

Ommabop stikerlar

Istalgan Telegram foydalanuvchisi shaxsiy stikerlar toʻplamini yaratishi mumkin, stikerlar katoligimizda minglab mualliflik toʻplamlaridan bepul foydalanish mumkin – shuning uchun, istalgan holat uchun mos keluvchi stikerni topish mumkin. Bugungi yangilanish bilan qidirish yanada osonlashdi.

Ommabop stikerlar endi stikerlar panelingizning “Yaqinda ishlatilganlar yuqorisida koʻrsatiladi. Biror toʻplamni kelgusiga saqlash uchun Qoʻshish tugmasini bosing. Ommabop stikerlar roʻyxati muntazam ravishda yangilanadi.

Kerakli stikerni tanlash qulayroq boʻlishi uchun toʻplamlar eskizlari kattalashadi, panelning yuqori qismini aylantirganingizda eskiz yonida toʻplam nomi koʻrsatiladi.

Android uchun Telegram ham stikerlar tavsiyalari uchun kattaroq razm solish imkoniyatiga ega boʻldi. Tavsiyalar olish uchun kiritish maydoniga bitta emoji kiriting. Yana boshqa tavsiya etiladigan stikerlarni koʻrish uchun tavsiyalar panelida yuqoriga torting.

Agar biror narsa haqida oʻylasangiz, lekin u stikerlar toʻplamlaringiz orasida boʻlmasa, stikerlar katalogidan mos keluvchilarni topish uchun biror soʻz yozing. “Sariq”, “hayvon”, “it” va boshqalarni sinang.

Stiker tanlash

Agar suhbatdoshingiz javob uchun mos keluvchi stikerni tanlayotgan boʻlsa, siz bu haqida avvalgi “Yozmoqda…”, yoki “Ovozli xabar yozmoqda” kabi “Stiker tanlamoqda” holati orqali bilib olasiz, u chat sarlavhasida koʻrsatiladi.

Oʻqilmagan fikrlar hisoblagichlari

Aksariyat kanallar obunachilar munosabatga kirishishi va fikrlarini ulashishi uchun postlariga fikr bildirish funksiyasini yoqqan. Yaqinda ushbu postga minglab foydalanuvchilardan minglab tabriklar oldik – barchangizga rahmat!

Endi kanaldagi postlarga bildirilgan fikrlarni ochish orqali darhol oʻqilmagan xabarlar hisoblagichini koʻrasiz.

Yangi animatsiyali emojilar

Har bir yangilanishda animatsiyali emojilarni qoʻshishni ogʻishmay davom ettirmoqdamiz. Animatsiyali versiyasini koʻrish uchun istalgan chatda ushbu emojilardan birini alohida xabarda yuboring:

Buguncha shular. Keyingi yangilanish uchun ayrim yangiliklar deyarli tayyor – tez orada koʻrishguncha!

2021-yil, 31-avgust
Telegram jamoasi