Шағын қолданба тақтасы, ақылы медиа, хикая іздеу және т.б.

Маусымдағы жаңарту сізге шағын қолданбаларды ықшам тақтаға дейін кішірейтуге мүмкіндік береді, контент жасаушыларға арналарын ақылы сурет пен бейнелерден табыс табуға көмектеседі және хикая бөлімін жетілдіріп, хештег немесе орналасқан жер бойынша іздеуді, сондай-ақ жаңа сілтеме виджетін енгізеді.

Бүгіннен бастап шағын қолданба әзірлеушілері мен контент жасаушылар тапқан жұлдыздар арқылы Toncoin түрінде сыйақы алуға немесе Telegram жарнамаларын жеңілдетілген бағамен сатып алуға мүмкіндік алады.

Шағын қолданба тақтасы

Ай сайын 500 миллионнан астам Telegram қолданушысы шағын қолданбалар арқылы өнімдер сатып алады, қызметтерге қол жеткізеді және ойындар ойнайды.

Енді шағын қолданбаларды экранның төменгі жағындағы тақтаға жинай аласыз. Бұл сізге хаттарға жауап беруге немесе басқа шағын қолданбаларды ашуға мүмкіндік береді, кейін қолданбаны қайта жүктемей-ақ оған оралуға болады.

Қолданбаны кішірейту үшін оның тақырыбын төмен қарай сырғытыңыз. Қайта ашу үшін экранның төменгі жағындағы тақтаны басып, белсенді қолданбалардың бірін таңдаңыз.

Әзірлеуші болсаңыз, толық ақпарды осы беттен көре аласыз.

Жұлдыз арқылы контентке төлем жасау

Өткен айда жұздыз жүйесін шағын қолданбалардағы цифрлық өнімдерді сатып алу үшін іске қостық.

Енді контент жасаушылар өз арналарында ақылы суретті немесе бейнені жариялап, жұлдыз қабылдай алады. Жазылушылар бұндай жазбаларды тек авторға төлем жасағаннан кейін ғана көре алады.

Жасаушылар жұлдыз арқылы Toncoin криптовалютасында сыйақы ала алады немесе оларды арналарын жарнамалауға қолдана алады, Telegram-нан шамамен 0% комиссия.

Хикаяны хештег арқылы іздеу

Кез келген чаттағы #хештегті басқанда, өз чаттарыңыздан және жария арналардан сол тегке қатысты іздеу нәтижелерін көресіз. Бұл жаңартуда хикая жазбаларындағы хештегтерді басқанда сәйкес тегтері бар жария хикаяны көруге болады.

Контент жасаушы немесе бизнес иесі болсаңыз, хештегтер аудиторияңызды кеңейтуге көмектеседі, Telegram қолданушылары бейініңізді немесе арнаңызды табиғи түрде таба алады.

Telegram Business жасаушылар мен компанияларға арналған қуатты мүмкіндіктерді ұсынады және ол Telegram Premium-мен бірге тегін қолжетімді.

Хикаяны орналасуы арқылы іздеу

Демалыстағы, іс-шарадағы қолданушылар өз хикаясына орналасқан жерін қоса алады. Бұл басқаларға әдемі көріністерді немесе дәмді тағамдарды қайдан табуға болатынын көрсетеді.

Орналасқан жерді басқанда сол жерден жарияланған жария хикаяны көре аласыз, осылайша кешегі концертті қайта еске алып немесе келесі сапарыңызды алдын ала көре аласыз.

Сізге көруге рұқсат етілген хикаяны ғана іздеу нәтижелерінде көрсетіледі. Жеке хикая ешқашан іздеу нәтижелерінде шықпайды.

Хикаядағы сілтеме виджеті

Premium қолданушылары хикаяға сілтеме виджетін қоса алады. Бұл сурет немесе бейнеде стильді сілтеме көрінісін жасайды және ол ашық әрі қараңғы фонды** қолдайды.

Сілтеме виджеті сізге жеке сілтеме атауын қосуға мүмкіндік береді, ол көріністегі сілтеме мәтінін алмастырады.

Контент жасаушылар мен әзірлеушілерге сыйақылар

Цифрлық тауарлар мен қызметтерді ұсынатын бот әзірлеушілері және арналарын ақылы жазбалармен табыс табатын жасаушылар енді тапқан жұлдыздар арқылы Toncoin сыйақысын ала алады немесе Telegram жарнамаларын сатып ала алады.

Telegram іс жүзінде комиссия алмайды, тек салықтар мен төлем жүйесінің алымдары қолданылады. Жұлдызды Telegram жарнамасының тіркелгісіне аударғанда, Telegram үшінші тарап төлем жүйесінің барлық алымын жабу үшін 30% жеңілдік қосады.

Toncoin сыйақылары

Арнаңызда немесе ботыңызда жұлдыз болса, оларды Fragment арқылы Toncoin сыйақысы ретінде ала аласыз. Toncoin – The Open Network-тің негізгі валютасы, ол әлемдегі ең жылдам блокчейн. Оларды кез келген басқа криптовалютаға оңай ауыстыра аласыз.

Жұлдыздарды жинау түпкі мақсатыңыз болмаған жағдайда ғана.

Боттағы жұлдыз теңгерімін көру үшін Бейін → Өңдеу → Теңгерім бөліміне кіріңіз. Арналар үшін Бейін → Статистка → Табыс бөліміне өтіңіз.

Жасаушылар мен әзірлеушілерге арналған жеңілдетілген жарнама

Кез келген адам өз боты, арнасы немесе тобы үшін жария Telegram арналарында құпиялықты сақтайтын жарнамаларды орналастыра алады.

Бот әзірлеушілері мен контент жасаушылар өз ботын немесе арнасын жұлдыз арқылы 30% жеңілдікпен жарнамалай алады, бұл жаңа қолданушыларға қол жеткізудің тиімді жолы.

Зефир сынағын жеңген болсаңыз ғана.

Жұлдыз арқылы жарнама жасау үшін ботыңыздың немесе арнаңыздың Теңгерім немесе Табыс бөліміне кіріп, «Жарнама сатып алу» таңдаңыз. Жұлдыз тек оларды тапқан сол бот немесе арнаны жарнамалауға қолданылады.

Толық ақпар алу үшін Бот әзірлеушілеріне арналған қызмет көрсету шарттарын және Контент жасаушыларға арналған шарттарды қараңыз.

Бүгінге осы, келесі жаңартуды әзірлеудің орнына хикая қарап, ойын ойнап жүреміз.

2024 жылы 30 маусым,
Telegram командасы