Mini ilovalar paneli, pulli media, hikoyalar qidiruvi va boshqalar

Iyun yangilanishimizdan boshlab Telegram foydalanuvchilari mini ilovalarni ixcham panelga kichraytirishi, kontent mualliflari esa pulli rasm va videolar yordamida kanallarini monetizatsiya qilishi mumkin. Bundan tashqari, hikoyalarni yaxshiladik: endi ularga heshteg yoki joylashuv asosida qidirish imkoniyati va havolalarni aks ettirish uchun yangi vidjet qoʻshildi.

Bugundan boshlab mini ilova dasturchilari va kontent yaratuvchilari oʻzlari ishlab topgan Yulduzlarni Toncoinda mukofot olish yoki Telegram Reklamalarni maxsus chegirmali narxlarda sotib olish uchun ishlatishi mumkin.

Mini ilovalar paneli

Har oy 500 milliondan ortiq Telegram foydalanuvchilari mini ilovalar bilan mahsulotlar xarid qilish, xizmatlardan foydalanish va oʻyinlar oʻynash uchun munosabatga kirishmoqda.

Bugundan boshlab ekranning pastki qismida mini ilovalarni panelga yigʻishingiz mumkin. Bu sizga xabarlarga javob berish, boshqa mini ilovalarni ochish va uning qayta yuklanishini kutmasdan mini ilovaga qaytish imkonini beradi.

Ilovani kichraytirish uchun shunchaki uning yuqori panelidan pastga suring. Qayta ochish uchun ekraningizning pastki qismidagi ilovalar panelini bosing va faol ilovalaringizdan birini tanlang.

Agar dasturchi boʻlsangiz, tafsilotlar uchun ushbu sahifa bilan tanishing.

Telegram Yulduzlar bilan kontent uchun toʻlash

Oʻtgan oy biz mini ilovalarda raqamli mahsulotlarni xarid qilish uchun Telegram Yulduzlarni ishga tushirgan edik.

Endi kontent mualliflari kanallarida pulli rasm yoki videolar nashr qilish orqali Yulduzlarni qabul qilishi mumkin. Obunachilarga bunday postlarni faqat muallifga ularni ochish uchun toʻlaganidan keyin koʻrishga ruxsat beriladi.

Mualliflar Yulduzlardan Toncoinda kriptovalyuta mukofotlari olish yoki oʻz kanallarini reklama qilish va yanada koʻproq obunachilarni jalb qilish uchun foydalanishi mumkin hamda bularning hammasiga Telegramdan hech qanday komissiya olinmaydi.

Hikoyalarni heshteg asosida qidirish

Istalgan chatda #heshteg bosilsa, bu sizga ushbu teg uchun chatlaringiz va ommaviy kanallardan qidiruv natijalarini koʻrish imkonini beradi. Bu yangilanish bilan hikoya izohlaridagi heshteglarni bosish sizga mos keladigan teglar bilan ommaviy hikoyalarni kezish imkonini beradi.

Agar siz kontent muallifi yoki biznes egasi boʻlsangiz, Telegram foydalanuvchilariga profil yoki kanalingizni organik ravishda kashf etish imkoniyatini bergan holda heshteglar yordamida auditoriyangizni oshirishingiz mumkin.

Telegram Biznes mualliflar va kompaniyalar uchun kuchli funksiyalarni taklif qiladi va Telegram Premium obunasiga bepul kiritiladi.

Hikoyalarni joylashuv asosida qidirish

Dam olishda, tadbirda boʻlgan yoki shunchaki ovqatlanishga chiqqan foydalanuvchilar hikoyalariga joylashuv tegini qoʻshishi mumkin, bu esa boshqalarga chiroyli manzaralar va mazali taomlarni qayerdan topishni koʻrsatadi.

Heshteglar kabi, joylashuv tegini bosish sizga bir xil joydan ommaviy hikoyalarni kezish imkonini beradi — shu tarzda, kechagi konsert atmosferasiga qayta tushishingiz yoki keyingi sayohat manzilingizga razm solishingiz mumkin.

Faqat sizga koʻrishga ruxsat berilgan hikoyalar heshteg yoki joylashuv qidiruvida chiqadi. Maxfiy hikoyalar hech qachon qidiruv natijalarida chiqmaydi.

Hikoyalarda havola vidjeti

Premium foydalanuvchilar hikoyalariga havola vidjeti qoʻshish orqali havolani ajratib koʻrsatishi mumkin. Bunda rasm yoki videongizda mediangizga mos keladigan yorugʻ va qorongʻi fonlarni qoʻllab-quvvatlaydigan uslubli havolaga razm solish oynasini yaratiladi.

Havola vidjeti sizga maxsus havola nomini qoʻshish imkonini beradi — bu razm solish oynasi yuqorisidagi URL manzil matni oʻrnini egallaydi.

Kontent mualliflari va dasturchilar uchun mukofotlar

Raqamli mahsulotlar va xizmatlar taklif qiladigan bot dasturchilari va kanallarini pulli postlar bilan monetizatsiya qiladigan mualliflar endi Telegram Yulduzlar orqali Toncoinda mukofot olishi yoki Telegram Reklamalarni sotib olishi mumkin.

Telegram Yulduzlardagi tranzaksiyalardan deyarli komissiya olmaydi, shuning uchun faqat soliqlar va to‘lov tizimi to‘lovlari tatbiq etiladi. Yulduzlarni Telegram Reklama hisobingizga o‘tkazganingizda Telegram hatto tashqi to‘lov tizimi to‘lovlarini qoplash uchun 30% chegirma qo‘shadi.

Toncoin mukofotlari

Agar kanal yoki botingiz balansida Yulduzlar boʻlsa, ularni Fragment orqali Toncoin mukofoti sifatida yechib olishingiz mumkin. Toncoin The Open Network — dunyoning eng tezkor blokcheynidagi asosiy valyuta hisoblanadi. Uni boshqa har qanday kriptovalyutaga oson ayirboshlashingiz mumkin.

Yulduzlarni yigʻish yakuniy maqsadingiz boʻlmagan taqdirda.

Botingizning Yulduzlar balansini koʻrish uchun uning Profiliga kiring > “Tahrirlash > Balans” tugmasini bosing. Kanallar uchun Profil > Statistika > Monetizatsiya rukniga kiring.

Mualliflar va dasturchilar uchun subsidiyali reklamalar

Istalgan foydalanuvchi oʻz boti, kanali yoki guruhini reklama qilish uchun ommaviy Telegram kanallarida reklamalarni joylashtirishi mumkin.

Bot ishlab chiquvchilari va kontent mualliflari Yulduzlar yordamida bot yoki kanalni maxsus 30% chegirmali narxda reklama qilishi mumkin – bu yangi foydalanuvchilarni jalb qilishning tejamkor usulidir.

Xohishingiz shunchalik kuchliligidan butun zefirni qadogʻidan darhol yeb qoʻygan taqdiringizda.

Reklamalar uchun Yulduzlardan foydalanish uchun bot yoki kanallaringizning Balans yoki Monetizatsiya rukniga kiring va “Reklamalarni sotib olish” tugmasini bosing. Yulduzlardan faqat ularni ishlab topgan bir xil bot yoki kanalni reklama qilish uchun foydalanish mumkin.

Yulduzlaringizni boshqarish, mukofotlar olish va reklamalar joylashtirish haqida batafsil axborot olish uchun Bot ishlab chiquvchilar va Kontent mualliflari uchun Xizmat shartlari bilan tanishing.

Buguncha shular — keyingi yangilanish ustida ishlash oʻrniga hikoyalarni kezish va oʻyinlar oʻynash bilan band boʻlamiz.

2024-yil, 30-iyun,
Telegram jamoasi