Hikoyalar va Telegramning 10 yilligi

Bugun Telegram oʻzining 10-tugʻilgan kunini nishonlamoqda va biz yubiley munosabati bilan messenjerning butun tarixi davomidagi eng katta yangilanishni tayyorladik. Oʻtgan oʻn yillik davomida hozirda 800 milliondan ortiq inson foydalanayotgan yuzlab yangi funksiyalarni qoʻshdik. Bu yangilanishda unikal juft kamera rejimi, batafsil maxfiylik sozlamalari, moslashuvchan davomiylik variantlari va boshqa koʻplab imkoniyatlarga ega hikoyalarni ishga tushirdik.

2023-yil, sentabr: Telegram kanallar ham yangi ovoz berish tizimi yordamida hikoyalar joylashi mumkin. Batafsil »

Telegram Hikoyalar

Hikoyalar hayotiy lahzalarni tezda ulashish va doʻstlar nimalarni ulashganini bilib olish imkonini beradi. Endi ushbu format Telegramda ham mavjud.

Bu Telegram tarixidagi foydalanuvchilar eng koʻp soʻragan funksiya edi va biz oxirgi bir necha oy ushbu formatni rivojlantirdik va takomillashtirdik. Endi Telegram Hikoyalarda siz koʻrishni xohlagan barcha narsa va hali hech kim kiritmagan yana koʻplab funksiyalar bor.

Hikoyalar ekraningiz yuqori qismidagi kengayadigan panelda aks etadi, shuning uchun bu chatlaringiz roʻyxati va jildlaringizni toʻliq uzunlikda koʻrishga xalaqit bermaydi.

Hikoyani koʻrayotganda tezda ulashish uchun bosishingiz, maxfiy tarzda javob berishingiz va reaksiya bildirishingiz mumkin – tezkor uchun bitta bosing yoki boshqa yuzlab reaksiyalardan foydalanish uchun bosib turing.

Birlamchi sozlamalarda bosh sahifangizda barcha kontaktlaringizdan hikoyalarni koʻrasiz va muayyan kontaktlarni arxivlangan chatlarga yuborish orqali ulardan hikoyalarni berkitishingiz mumkin.

Juft kamera rejimi

Rasmli va video hikoyalarni birdaniga ikkita rakursdan olish mumkin: qurilmaning old va orqa kameralaridan bir vaqtda foydalanishingiz va ular orasida hatto yozib olish paytida ham almashtirishingiz mumkin.

Stikerlar, joylashuvlar va izohlar

Hikoyalar Telegramning kuchli media muharriridan foydalanadi – bu sizga matn, chizma, stikerlar qoʻshish yoki joylashuvingizni belgilash imkonini beradi. Yanada koʻproq kontekst uchun hikoyalar uzunroq izohlarni qoʻllab-quvvatlaydi – unda uzunroq matn tavsiflarini kiritishingiz, doʻstlaringizni belgilashingiz yoki havolalar qoʻshishingiz mumkin.

Galereyangizdan qoʻshimcha rasmlarni qoʻshishingiz yoki vebdan GIF va rasmlarni qidirishingiz mumkin.

Batafsil maxfiylik sozlamalari

Hikoya joylaganda 4 ta maxfiylik sozlamasidan birini tanlashingiz mumkin: Hamma, Kontaktlarim, Yaqin doʻstlar va Tanlangan kontaktlar. Har bir variantni moslashtirish mumkin, bu sizga istalgan foydalanuvchini kiritish yoki istisno qilish imkonini beradi.

Hikoyalaringizni hech qachon koʻrmaydigan foydalanuvchilar roʻyxatini tanlashingiz mumkin, shunda rahbaringiz yoki buvingiz sarguzashtlaringizni kuzata olmaydi.

Hikoyani yanada maxfiy qilish maqsadida foydalanuvchilar uni saqlashi yoki ulashishining oldini olish uchun skrinshotlarni faolsizlantirishingiz mumkin.

Profillardagi hikoyalar

Hikoyalaringiz tanlovingizga qarab 6, 12, 24 yoki 48 soat davom etishi mumkin. Eski kontaktlar va yangi tanishlar xotira lahzalaringiz mozaikasini varaqlay olishi uchun hikoyalarni profilingizga ham joylash mumkin. Profilga joylangan hikoyalar ularni arxivga joylash yoki oʻchirishga qaror qilmaganungizgacha oʻsha yerda qoladi.

Endi Telegramda kim bilandir tanishganingizda nafaqat profildagi rasmlarini varaqlashingiz, balki ushbu insonning muhim yoki kundalik hodisalari haqida ham bilib olishingiz mumkin.

Siz profilingizga joylaydigan har bir hikoya alohida maxfiylik sozlamalariga ega – har doim hikoya koʻrinadigan foydalanuvchilar doirasini oʻzgartirishingiz mumkin.

Hikoyalarni tahrirlash

Ijtimoiy tarmoq tarixida birinchi marta hikoyangizning istalgan elementini istalgan vaqtda yangilashingiz mumkin: koʻrinuvchilik, izoh, ekrandagi matnlar, stikerlar va boshqa elementlar – buning uchun joylangan hikoyani oʻchirish va yangisini yaratishingizga toʻgʻri kelmaydi.

Hikoyangizni tahrirlash uchun uni siz joylagan qurilmadan oching va yoki > Hikoyani tahrirlash bandini bosing.

Batafsil koʻrish statistikasi

Foydalanuvchi hikoyani ochganida ular oʻqilganlik hisobotlari kabi hikoyaning muallifiga koʻrinadigan koʻrganlar roʻyxatida chiqadi.

Hikoyani joylaganingizdan keyin roʻyxatni koʻrish uchun uni ochishingiz mumkin, unda faqat kontaktlarni koʻrsatish uchun filtrlashingiz, avval oxirgi koʻrganlar yoki avval reaksiyalar asosida saralashingiz mumkin. Agar muayyan foydalanuvchi uni koʻrganini tekshirmoqchi boʻlsangiz, qidiruv paneliga uning ismini yozing.

Telegram Premium obunasiga ega foydalanuvchilar hikoyalarni koʻrganda anonimlikni saqlash uchun koʻrinmaslik rejimini yoqishi mumkin. Foydalanuvchi ushbu rejimni yoqqanidan keyin oʻtgan 5 daqiqada ochgan yoki keyingi 25 daqiqa davomida ochadigan hikoyalar mualliflari uni koʻrganlar roʻyxatida koʻrmaydi.

…va boshqalar

Bu blogpostga sigʻmagan barcha hikoya funksiyalarini koʻrish uchun Telegram Hikoyalarga batafsil qoʻllanmamiz bilan tanishing.

Bu ajoyib 10 yil uchun barchaga rahmat. Bayram kayfiyatini davom ettirishni xohlaganlar uchun Telegram asoschisi va bosh direktori oʻz kanalida ushbu bayramga oid fikrlarini ulashdi

Biz esa qoʻllarimizda tortni tutgancha allaqachon keyingi yangilanish ustida ishlamoqdamiz.

2023-yil, 14-avgust
Telegram jamoasi